السلام عليكم..
ممكن تستغرب اصلا ليه ممكن يكون فيه مساحه ما على الإنترنت بتحتوى كلام ممكن ميبقاش معبر عن ناس كتير وممكن ميبقاش معبر أصلاً، ولكن ليه اساساً تبقى متوقع ان كل الكلام اللى هتتعرضله ف حياتك بالضروره يكون بيعبر عنك شخصياً؟ بجد، ليه الإنسان ممكن يكون أناني للدرجه دي؟ فكر فيها
حاجات كتير جدا بتواجهها ف حياتك هيا بشكل ما ملهاش علاقه بيك شخصيا وكنتجيه لده بترفضها كفِكره ومع الوقت بتدرك انك بشكل لا واعي محطوط فى دايره من سواء بقا علاقات او مساحه فعليه أو حتى افتراضية محدوده جدا! ممكن متتعداش المتر المربع وتبدأ دايره مفرغه من كره العالم وعدم تقبل البشر وحاجات كليشيه مليئه بالمراهقه المتأخره وعدم الوعي بكونك "مش لوحدك"، فكر فيها
بالرغم من انك مدرك مدى صِغَر حجمك مقارنة بالكون إلا إنك لازلت بتصر ان الحياه بتقف عليك أو على فكرتك، بينما لو خدت كده خطوه لورى وبدأت تبص للأمور بشكل حيادي وبعيد بشكل مش كبير أوي عن التعصب الفكري هتلاقي نفسك مستريح أكتر (عجيب)
وده مش عشان انت فكرتك غلط والفكره التانيه صح أو العكس، لأ الموضوع مش كده هيا الفكره ان مفيش حقيقه مطلقه لأي شيء فى الدنيا، ومحاولتك المستميته لفرض نفسك مش حاجه منطقيه فعليا لإن إنت مش إله! انت مش كيان مطلق انت ناقص والنقصان هنا فِعلى مش مجرد كلمه بتتردد وخلاص على لسانك لما بتحس بعجز تجاه موقف ما، لأ دي حقيقه ولازم تسلم بيها، وتعتنقها وتمشي وتعامل الناس بناء عليها.
بص للأمور بقدرها وأول الأمور نفسك، والباقي كله بسيط ان شاء الله.
